दशावतार सिनेमाला प्रेक्षकांचा भरघोस प्रतिसाद; बॉक्स ऑफिसवर धडाकेबाज कामगिरी
नुकताच प्रदर्शित झालेला मराठी चित्रपट दशावतार प्रेक्षकांच्या पसंतीस उतरला आहे. कोकणातील पारंपरिक दशावतरी नाट्यप्रकार व त्यामागची संस्कृती यावर आधारित हा चित्रपट सध्या थिएटरमध्ये हाऊसफुल्ल चालत असून बॉक्स ऑफिसवर उत्तम कमाई करत आहे.
चित्रपटाच्या पहिल्या आठवड्यातच तब्बल १० कोटींच्या आसपासची कमाई झाल्याची माहिती समोर आली आहे. अनेक ठिकाणी अतिरिक्त शो लावावे लागत आहेत. सोशल मीडियावरही दशावतारची जोरदार चर्चा सुरू असून प्रेक्षक “मराठीत असे दर्जेदार सिनेमे नेहमी पहायला हवेत” असे मत व्यक्त करत आहेत.
दिलीप प्रभावळकर यांच्या दमदार अभिनयाने चित्रपटात विशेष रंग भरला आहे. त्यांच्यासोबत सिद्धार्थ मेनन, प्रियदर्शिनी इंदलकर, विजय केंक्रे आणि महेश मांजरेकर यांचीही महत्त्वपूर्ण भूमिका प्रेक्षकांना भावते आहे.
कोकणची नैसर्गिक दृश्यसंपदा, पारंपरिक नाट्याचा गंध, आणि सामाजिक संदेश यांचा सुंदर संगम या चित्रपटातून दिसून येतो. दिग्दर्शन, अभिनय, संगीत आणि दृश्य मांडणी यामुळे दशावतार हा प्रेक्षकांसाठी एक अविस्मरणीय अनुभव ठरत आहे.
चित्रपटसृष्टीतील जाणकारांच्या मते, “दशावतार हा यंदाच्या वर्षातील मराठीतील मोठा हिट चित्रपट ठरण्याची चिन्हे स्पष्ट दिसत आहेत.”
